Владата ја помага ИВЗ во корона-кризата со субвенционирање на 140 плати за вработените

Добивај вести на Viber

Владата на неколку пати исплаќала плати за 140 вработени во Исламската верска заедница како државна помош за надминување на кризата во ковид-периодот. Исламската верска заедница е влезена во списокот меѓу стотиците претпријатија кои добиле помош од државата за исплата на вработените. 

По два милиони денари ИВЗ редовно добивала на својата сметка во првиот циклус во мај, јуни и јули, а истата исплата продолжила и во декември и јануари оваа година. Иако станува збор за субјект кој не остварува профит и не учествува во стопанството, од Владата велат дека сепак тоа е организација која има свои вработени.

„Согласно Законот за финансиска поддршка на работодавачи погодени од здравствено-економската криза предизвикана од Ковид-19 за исплата на плати на работниците, работодавач е секој правен субјект кој вработува работници врз основа на договор за вработување, физичко лице кое вработува работници врз основа на договор за вработување и работодавач корисник согласно Закон за приватни агенции за вработување.

Во овој случај Исламска верска заедница како правен субјект со 174 вработени, поднела барање за финансиска поддршка за 140 вработени и ги исполнила условите за добивање на поддршката“, потврдуваат од Владата во одговорот кој го доби „Фактор“.

Верската организација, според она што може да се провери, е меѓу првите 40-тина баратели на државна помош според висината на исплатата која ја добиваат од државата. Сумите на највисоките исплати се движат од помалку од 10 милиони денари месечно па надолу.

Пред ИВЗ, која делува како натрапник меѓу стопанствениците, највисоките исплати ги добиваат казина, хотели и други услужни дејности, конфекцијата, пекарници, градежници, поштенски услуги  и дејности од трговијата, човечките ресурси и спортот.