Владата повеќе не дава, се бараат пари за ЕСМ

Добивај вести на Viber

Повеќе од еден месец АД ЕСМ нема добиено пари од Владата за покривање на загубите во енергетската криза со електрична енергија, но затоа и натаму се бараат различни начини како да се финансира „дупката“ што се јавува од разликата помеѓу скапата набавна и релативно евтината продажна цена за домаќинствата.

Една од последните одлуки е едно од поликвидните акционерски друштва во државна сопственост да му префрли позајмица на државните електрани, по донесената таква согласност на Владата. Од ЕСМ ни потврдија дека сумата што ја добиле од Државна лотарија на РСМ е 90 милиони денари.

Васко Ковачевски, генералниот директор на АД ЕСМ, вчера рече дека на компанијата до крајот на годината ќе и бидат потребни уште 100 милиони евра за надминување на енергетската криза. Првиот човек на државните електрани најави и задолжување кај Европската банка за обнова и развој со кредит од 50 до 100 милиони евра.

- ЕБОР дава можност за кредитно задолжување со камата под 1 процент, исплата на 6 години со грејс период од 6 месеци. Станува збор за сума од 50 и 100 милиони евра за покривање на разликата од производната и продажната цена, најави Ковачевски.

Неколку дена подоцна Владата донесе одлука да му исплати 11 милиони евра на МЕПСО преку Електрани на Северна Македонија откако доби одговор дека тоа не е можно поради тековно задолжување кај странски кредитор.

Само во месец февруари кризата принудно ја натера Владата да му исплати 58 милиони евра на државните електрани. Кога ќе се стави се на збир, излегува дека во 2022 за неполни два месеци се потрошени 80 милиони евра од владиниот буџет. Ако на ова се додадат и парите од 2021 по прогласувањето на енергетската криза, вкупниот износ грубо пресметан е 166 милиони евра.