Владимир Пешевски и Трајко Вељаноски станаа владини советници на Мицкоски
Објавено во: Економија 23 Јануари, 2025 07:50
Владата ги ангажирала поранешните функционери од ерата на владеењето на Никола Груевски - Владимир Пешевски и Трајко Вељаноски како надворешни соработници на премиерот Христијан Мицкоски.
За поранешниот вицепремиер за економски прашања и поранешниот претседател на Собранието може да се види дека добиваат исплати под шифрата „консултантски услуги“ на платформата „Отворени финансии“. Пешевски веќе редовно добива месечни исплати од 60.000 денари, додека Вељаноски од овој месец има една исплата од 38.710 денари што не може да се заклучи дали е целосна.
Во службата за односи со јавност на Владата прашавме кое подрачје ќе го покриваат Пешевски и Вељаноски како советници на премиерот, но од таму „Фактор“ не доби одговор во изминатите денови.
Пешевски беше виден на отворањето на патот Страцин - Крива Паланка на почетокот на месецов, заедно со другите членови на Владата и останатите државни функционери. За Вељаноски јавноста подолго време нема ништо прочитано, но и тој исто како Пешевски е поранешен истакнат член на ВМРО-ДПМНЕ, за кого велат дека често наминува во партиското седиште.
За Вељаноски можеше единствено да се прочита нешто откако беше обвинет за организација на нападот на Собранието на 27 април 2017, додека пак за Пешевски се пишуваше за случајот „Траекторија“ за постапката за избор на компанија за изградба на автопатиштата Миладиновци – Штип и Кичево – Охрид.
Инаку веќе е познато, иако Владата ова не го потврдува јавно, дека надворешни соработници на Мицкоски му се професорите Александар Спасеновски, Лазар Јовевски, Игор Николов и дипломатот Сашо Марковски.
На веб-страницата на Владата има посебен прилог за овој тип на советници, но нема линк на кој може да се видат имињата. Последен пат таму беа објавени имињата на 15-те поранешни надворешни соработници на претходниот премиер Димитар Ковачевски.
А.К.
Можеби ќе ве интересира
„Нашата цел е да привлечеме компании кои носат знаење, современи технологии и квалитетни работни места“: Димовски од ТИРЗ до менаџментот на Philips
ДЗР: Застарени предмети и неуплатени средства во буџетот на државата, ИТ напади и повеќе неправилности во работењето на Министерството за економија и труд
Хрватска повлекува храна за бебиња: Аптамилот има поголемо присуство на бактерии
ЕБОР: Рекордно ниско ниво на лоши кредити во Централна, Источна и Југоисточна Европа
На бензинските пумпи се појави нов вид гориво: Ќе се испорачуваат со „розови пиштоли“, а ќе може да се користи во сите автомобили
Планирате патување на одмор? Овие аеродроми во Европа ќе штрајкуваат до крајот на годината
Германија ги заострува условите за социјална помош
Руски министер кажа колкав процент од БДП потрошиле за војната во Украина
(ВИДЕО) АВСТРАЛИЈАНЕЦ СЕДУМ ГОДИНИ СОБИРАЛ АМБАЛАЖА: Заштедил за куќа
