Владината мерка за вработување на 1600 луѓе е извонредна помош за социјално загрозените

Добивај вести на Viber

Извонредна можност за една ранлива категорија граѓани. Вака премиерот Груевски ја оцени најновата владина мерка за вработување на 1.600 лица во јавната администрација од социјално загрозените семејства. Тоа е решавање на еден горлив проблем со кој се соочува оваа категорија граѓани, оцени денеска премиерот Никола Груевски.

Груевски смета дека на овој начин ќе им се излезе во пресрет на најзагрозените кои ќе се вработат и обучат во државните институции. Тој е свесен, дека со ова нема да се решат сите проблеми во оваа категорија, но вели дека помошта ќе биде голема.

- Ќе решиме голем дел од проблемите. Убеден сум дека на овој начин ќе успееме на оние кои се најзагрозени да им излеземе во пресрет и тие да бидат примени на работа и обучени и да се стават во корист на работењето на истутициите, изјави Груевски.

Груевски вели дека ова е одличен потег пред донесувањето на Законот за јавна администрација, во кој значително се зголемуваат критериумите за прием во државната и јавната администрација.

- Тоа се критериуми кои практично многу луѓе не ќе може да ги поминат затоа што ќе бидат доста високи. Така што во администарцијата ќе бидат примани луѓе кои имаат најголемо знаење, вештини, образование и искуство, рече Груевски.

Владата вчера објави дека ќе бидат вработени 1.600 лица од четири категории – долгорочно невработени, преку десет години, лица од многудетни семејства, лица од самохрани и еднородителски семејства, како и лица од семејства без ниту еден вработен.