Во градинките сè уште е рано да се зголеми бројот на деца: Комисијата за заразни болести го одби барањето на МТСП

Добивај вести на Viber

Министерката за труд и социјална политика Јагода Шахпаска денеска објави дека имала средба со претставнички на мајките коишто се на породилно отсуство, и разговарале за за состојбата за упис на децата во градинките, како и за потребата општините и директорите на градинките соодветно да го раководат процесот на прием на деца во градинките, за да се овозможи целосно искористување на капацитетите во градинките.

-Со оглед на стабилната состојба во градинките, како и поради фактот што вработените во градинките беа приоритетно вакцинирани, Министерството за труд и социјална политика достави писмен допис до Комисијата за заштита од заразни болести со кој предлага да се разгледа можноста за зголемување на бројот на деца во градинките. Доколку биде прифатен предлогот, дополнително ќе се зголеми капацитетот на градинките, ќе можат да се примат повеќе деца, со што ќе се обезбеди грижа за децата особено во оние семејства каде што и двајцата родители работат или пак се самохрани родители, наведува Шахпаска во објавата.

Но, министерот за здравство Венко Филипче, одговарајќи денеска на новинарско прашање при неговата посета на Клиниката за детски болести, рече дека Комисијата за заразни болести разгледала низа барања за олабавување на рестриктивните мерки, но за дел од нив здравствените власти сметаат дека е сè уште рано.

-Освен мерката која се однесува на полицискиот час, кој сега ќе почнува од 23 часот, како и работното време на угостителските објекти кое од денеска е до 22.30, другите барања беа одбиени. Имаше барање за отворање на теретаните, како и за зголемување на бројот на децата во градинките, но за ова Комисијата за заразни болести смета дека е се уште рано, рече министерот Филипче.

А.Б.