Во кои региони гробарите работат повеќе од бабиците?

Добивај вести на Viber

Според официјалните податоци на ДЗР лани бројот на почитани е поголем од бројот на новородени во : Источниот, Вардарскиот, Пелагонискиот, Југоисточниот и во Југозападниот регион. Сите овие региони се со доминантно македонско население. Најстрашно е во Пелагонија каде бројот на умрени е за 43 отсто поголем од бројот на живородени деца!!!

Македонската статистика е немилосрдна! Таа го вклучи црвениот аларм што треба да ги стресе и потресе сите „дисижн мејкери“ и „полиси мејкери“ во земјава. Ако ги погледнете официјалните државни податоци за соодносот меѓу новородените бебиња лани и бројот на починати лица ќе видите дека нашата состојба е застрашувачка кон очајна. Пет македонски региони , сите со доминантно етничко македонско население, умираат. Сите имаат поголем број на умрени од родени во 2017 година.

На врвот на листата на „белата чума“ е Пелагонија којалани испратила 3.062 лица и тоа е за 920 повеќе од бројот на живородени бебиња кој изнесува за лани 2.142. На второ место очекувано е македонскиот Исток. Бројот на починати лица е за 488 поголем од бројот на живородени деца. Родени на Исток лани се 1.454 деца и тоа е најмал број на живородени деца во споредба со сите други 7 региони во земјава. Југоистокот е во минус за 140 лица односно лани се родени 1.706 бебиња, а починале 1.846 лица. Вардарскиот регион е во негатива од 90 лица затоа што на живородените 1.589 бебиња, починале 1.679 луѓе. Најблизу до баланс односно статус кво е Југозападот каде негативната разлика е 36 лица, живородени се 1.971 бебе, а починале 2.007 лица.

Скопскиот регион како најнаселен има најголем број на новородени и починати лица. Природниот прираст е позитивен и изнесува 2.010 новородени повеќе од починати. Лани во скопскиот регион новородени се 7.753 бебиња, а починале 5.743 лица. Бројот на живородени е за 35 отсто поголем од бројот на починати.

Полог е единствена светла точка

Само полошкиот регион може да се гледа како светла точка од аспект на наталитетот во Република Македонија. Бројот на живородени бебиња е за 54 отсто поголем од бројот на почитани лица. Во апсолутни бројки тоа изгледа вака: живородени лани се 3.295 бебиња, што е за 890 лица повеќе од бројот на починати кој изнесува 2.405 лица. Доминантно е учеството на бебиња од албанска националност.

Соодносот на родени меѓу двете најголеми етнички заедници е : 11.204 Македонци и 6.933 Албанци. Кај Македонците наталитетот со негативен предзнак и изнесува 3.084 лица, а кај албанската популација е позитивен и изнесува 3.559 лица.

Р. Ф.