Во недела избори во Куба - Дали тоа ќе биде крај на долгогодишното владеење на фамилијата Кастро?
Објавено во: Свет 09 Март, 2018
Во недела во Куба ќе се одржат парламентарните избори. Повеќе од осум милиони Кубанци треба да изберат 605 членови на Националното собрание и 1.265 делегати во 15 провинциски собранија.
До сега изборната кампања се одвива тивко и мирно, без
рекламни спотови и предизборни митинзи. Нема кандидати под партиски слогани
затоа што сите или се членови на владејачката Кубанска комунистичка партија или
се „независни“ кандидати кои се придржуваат кон партиската линија.
Единствен знак кој ги најавува изборите се фотографиите и биографиите на
кандидатите објавени на јавни места. Самите кандидати тивко посетуваат квартови
и фирми за да контактираат со луѓето.
Причината за мирната и тивка изборна кампања некои ја припишуваат на владиниот притисок.
Интересот за изборите е поголем од вообичаено затоа што новиот Парламент треба да се состане на 19 април и да избере наследник на 86-годишниот претседател Раул Кастро. Се очекува новиот претседател да биде првиот кој не е член на семејството Кастро по револуцијата во 1959 година, кога Фидел, постариот брат на Раул, ја презеде власта.