Во Штип прогласена епидемија на жолтица
Објавено во: Економија 21 Август, 2014
Од ден на ден се зголемува бројот на заболени лица од жолтица во Штип. Тројца нови пациенти со симптоми на жолтица вчера беа примени на инфективното одделение во штипската болница.
Доколку анализите потврдат дека новите тројца имаат Хепатит А, со нив бројката на хоспитализирани пациенти само овој месец ќе достигне до 17, а од јуни до сега се хоспитализирани 25 лица.
Директорот на Центарот за јавно здравје Велик Грков изјави дека засега не може да се утврди причинителот на заразното заболување и затоа утре на помош ќе им пристигнат колеги од Институтот за јавно здравје од Скопје.
И додека надлежните смируваат дека нема простор за паника, бројот на хоспитализирани континуирано расте. Засега се уште е непознат и изворот од каде се шири заразата. Епидемиолозите остануваат на истиот став хоспитализираните пациенти се од градот и засега не може да ја најдат поврзаноста меѓу нив.
Во овој период минатата година од жолтица биле заболени две лица, во 2012-немало ниту еден. Алармантна била состојбата во 2011 кога биле хоспитализирани дури 40лица и била прогласена епидемија во општина Карбинци.