Во услови на криза Владата ќе распредeлува 5% од буџетот
Објавено во: Економија 24 Август, 2016
Во кризна состојба одобрените средства во постојната буџетска резерва може да се зголемат со прераспределба на средства само помеѓу министерствата и другите органи на државната управа.
За тоа одлучува Владата, но намалувањето може да биде најмногу до 5% од постојните буџетски средства на министерствата и другите органи на државната управа. Ова е предвидено во последните измени на Законот за буџети кој по скратена постапка е доставен до Собранието. При тоа треба да се внимава да не се наруши редовното функционирање на министерствата и реализирање на утврдените надлежности. Од Владата објаснуваат дека предлог - законот за изменување и дополнување на Законот за буџетите, по скратена постапка се предлага со цел брзо и ефикасно обезбедување на финансиски средства во случај на постоење на кризна состојба.
Од опозицијата тврдат дека ова е уште еден удар за намалување на транспарентноста за трошењето на народните пари.