Добивај вести на Viber
На Охрид му е потребна маркетинг стратегија за да се подобри нарушениот углед на македонскиот туристички центар, заклучија учесниците на вонредната седница на Локалниот економски совет, посветена на состојбите во туризмот, што ја свика охридскиот градоначалник Никола Бакрачески.
Угостителите и хотелиерите се пожалија на необјективно и тенденциозно известување во некои медиуми за лоша сезона или превисоки цени на услугите. Сепак, се согласуваат дека многу работи треба да се менуваат.
Пред се на Охрид му е потребна подобра инфраструктура, вели Бакрачески. Негово уверување е дека со изградбата на автопатот кон Кичево и преку воспостаување регуларни летови до Охридскиот аеродром преку целата година, ќе се придонесе за екстензија на сезоната, нејзино продолжување надвор од вообичаениот шпиц лимитиран само на летниот период.
Сепак, градоначалникот нагласува дека експертите од областа на туризмот се согласни оти цените на услугите во Охрид се прифатливи за секој џеб, зависно профилот на гостите, како и на веќе забележителниот растечки број странски гости во градот и тренд на пад на бројот домашни гости кои летуваат тука.
Според првиот човек на Стопанската комора на Македонија Бранко Азески, потребно е да се види што може да се направи и со постоечката инфраструктура.
„Она што се случува тука е последица веројатно и на долгата криза, финансиската исцрпеност на балканските земји. Најсериозното прашање е со што Охрид може да конкурира на седумте мориња околу нас кои преку изградена инфраструктура стануваат се подостапни до туристите“, вели Азески.
Како итни мерки кои можат да се преземат веднаш, познавачите споменуваат воведување т.н. „happy hour“ кај угостителските објекти, додека кај хотелите да се работи на зголемување на просечниот број денови на престој, со понуда за пониски цени или гратис ноќевања за продолжен престој. Туристичките агенции, пак, да работат на привлекување туристи од државите кон кои веќе оперираат субвенционирани евтини авиокомпании.