Вработените во МЖ Транспорт ако в среда не добијат дел од платата ќе следи штрајк

Добивај вести на Viber

На вработените во МЖ Транспорт во среда до 15.30 часот да им биде исплатен вториот дел од платата за јули.

Ова го договориле на денешната средба претставници на четири синдикати од Македонски железници Транспорт,  Министерството за транспорт и менаџерскиот тим на МЖ Транспорт.

Договорено е наредните плати да не го надминуваат месецот за исплата.

Ако не се исплати платата согласно договореното в четврток напладне започнува генерален штрајк, соопштија НСПМЖ и синдикалните организации МЖ Транспорт, на вработените на подружница Влеча на возови и на Независниот синдикат на машиновозачите и железничарите. Синдикатите информираат дека ако дојде до штрајк,  меѓународните возови ќе сообраќаат, а во локалниот патнички сообраќај ќе има само по еден пар возови.

Тие претходно најавија активирање на штрајкот затоа што раководството не го исполнило договореното за исплата на вториот дел од платата до 25 август. Тие бараат и да се исплатат јубилејните награди за вработените кои исполнуваат услов согласно со одредбите од Колективниот договор, како и да се разгледаат и преиспитаат изречените санкции кон дел од вработените.

Од раководството на МЖ Транспорт укажуваат дека во изминатите четири месеци заради блокадите од грчка страна, Солунското пристаниште и штрајкот на работниците на Грчките железници, Македонски железници претрпеле директна штета од пет милиони евра што придонело за тешкотии во тековното работење и исплатата.