„ЗА ОВА НЕ СМЕЕ НИКОЈ ДА ЗНАЕ, МОЖЕ И ГЛАВИ ДА ЛЕТААТ“: Кешишов во судот истакна дека не знаел каков бил планот

Добивај вести на Viber

Денеска продолжи судењето за убиството на малата Вања Ѓорчевска и велешанецот Панче Жежовски, при што продолжи испрашувањето на обвинетиот Влатко Кешишев. На прашањата на судијата Ивица Стефановски, Кешишев даде исказ за настаните поврзани со случаите, откривајќи детали за киднапирањето и убиствата на Панче и Вања. Тој сведочеше и за својата улога во партијата „Десна“ и за настаните кои довеле до трагичниот исход.

Кешишев образложи дека бил домар во политичката партија „Десна“ каде што и престојувал. Тој потврди дека готвел храна за Палчо, за себе и за присутните, додека, за гостите и симпатизерите правел и служел кафе и сок.

На прашањето дали секогаш го правел тоа што му кажувал Палчо, одговори „да, му бев како десна рака“.

Одговарајќи на прашања на судијата, Кешишев раскажа за подготовките за киднапирањето на Панче и моментот кога слушнал истрел, но нагласи дека бил далеку од местото на настанот. 

- Кога беше убиен Панче, бев многу далеку и не знам што се случуваше - рече тој.

Тој посочи дека не бил свесен за плановите кои воделе до убиството.

Во својот исказ, Кешишев истакна дека бил предупреден да молчи за случувањата, одговарајќи на прашањето зошто после убиството на Панче не се откажал.

- Првиот пат ме опомена Вељо кога ја завршивме дупката, дека „за ова не смее никој да знае, може и глави да летаат“ - сведочеше тој, додавајќи дека го сфатил тоа како закана.

Прашан врз основа на што ја темели претпоставката дека во ранецот што го носел Палчо бил пиштолот, одговори „моја претпоставка е дека тој би се забележал на појасот на тој што го носи“. На дополнителното прашање дали тоа значи дека се носи пиштол за да се оди да се грабне Панче одговори „не знаев додека не се случи сето тоа што се случи“.

Прашан на што ја базира претпоставката дека пиштолот го има Боре одговори дека заклучокот го извел од судница. 

- Според она што се зборуваше, дека пиштолот бил на Боре, Боре призна дека има пиштол, не знае каде е, по таа логика помислив дека е негов. Заклучокот го извлеков од судница - рече Кешишев.

Кешишев одговори потврдно на прашањето дали снимките што ги видовме во судот беа од моментот на грабнувањето.

Во однос на прашањето дали автомобилот Рено Кангу било чистено со WD40, одговори „не видов, мислам не“.

Според најавеното, по сослушувањето на Кешишев, треба да сведочат таткото на Вања, Александар Ѓорчевски и Љупчо Палевски.

Во обвинението стои дека Љупчо Палевски, Боре Видевски, Велибор Манев, Влатко Кешишов и Александар Ѓорчевски, заедно испланирале грабнување на 14-годишната Вања Ѓорчевска со цел да присилат член на нејзиното потесно семејство да даде парични средства за откуп. 

Грабнувањето на оштетениот Панче Жежовски во Велес, пак, според обвинението, било со намера да го присилат да им го даде сопственото возило „Цитроен“ за да го користат за грабнување на детето во Скопје.

Малолетната Вања и велешанецот Панче, беа пријавени за исчезнати на 27 и 24 ноември, а на 3 декември 2023 година беа пронајдени мртви во близина на Скопје и Велес.

Фото: Вангел Тануровски