ЗА ПРВ ПАТ ВО ИСТОРИЈАТА: ЕСМ уште сега купува струја за цел ноември и декември

Добивај вести на Viber

За прв пат во историјата АД ЕСМ за потребите на потрошувачката на електрична енергија во земјата уште во јули ќе купува електрична енергија за ноември и декември.

Објавен е повик за купување на големо количество на електрична енергија од вкупно 132.000 мегаватчасови од 1 ноември до 31 декември.

Снабдувачите и трговците своите понуди ќе треба да ги достават најдоцна до утре, а електричната енергија ќе се купува во десет периоди во текот на овие два месеци.

Ова досега во пракса никогаш не се случило - да се планира долгорочно купување на најчесто увозна струја од отворениот пазар. Секогаш се купувало преку повици на краток рок или по актуелните цени од берзата ден-однапред.

Останува да се види дали е некоја корпоративна одлука со која на овој начин би се обезбедила поевтина цена за периодот на грејната сезона. По денешната цена од 104 евра на HUPX берзата, ова количество што го бара ЕСМ би се купило за околу 13,7 милиони евра.

Веќе подолг период производството на државното електростопанство не може да ги задоволи потребите на малите потрошувачи и на домаќинствата, па за да обезбеди социјален мир, купува или увозна или електрична енергија од берзата, но и увозен јаглен.

ЕСМ првиот квартал од 2025 година го заврши со загуба од 45 милиони евра, според евиденцијата на Министерството за финансии.

А.К.