Заев: Ние што направивме нашата земја да биде призната од цел свет, ние сме патриоти, а не тие

Добивај вести на Viber

Нашата земја сега е призната од целиот свет, исто како и јазикот и идентитетот. Затоа, тие не треба да се прават патриоти.

Ова го порача лидерот на СДСМ Зоран Заев од вчерашниот митинг во Кавадарци.

„Навистина успеавме да оствариме вековни соништа на нашите предци, ние сме сега центарот на Европа, имаме парче земја призната од целиот свет, исто како и јазикот и идентитетот. 30 години ниту еден политичар немаше мудрост и храброст да донесе одлука, да повлече потег. Дојдов јас, Зоран Заев од струмичко Муртино, и повлеков потег. Цели генерации се уништија за да можат политичарите да останат на власт, да имаат пари и моќ. Денес, нашата држава е призната од цел свет, впишана во архивите на ООН, а таму пишува Македонци, пишува македонски јазик. Кога зборував на македонски јазик во Европскиот парламент и кога изустив дека ми е драго што можам да зборувам на нашиот македонски јазик, цел парламент аплаудираше и потврди дека нашиот јазик постои“, рече Заев. 

И сега тие се патриоти, а ние не сме, праша лидерот на СДСМ. 

„Оние кои го слават Тодор Александров, тие се патриоти? Оние кои го негираат Блаже Коневски се патриоти? Ние не сме патриоти што седиме до светските лидери и држиме говори еден по друг, не сме патриоти што го дигнавме нашето знаме пред седиштето на НАТО? Ова е патриотизам и можат само да учат. Ние го остваруваме тоа што три децении само се зборува и се ветува, и сега кога е исполнето, ние не сме патриоти?“, рече Заев.

Тој ги повика граѓаните на 15 јули да излезат и да ги изберат вистинските патриоти, оние кои и мислат добро на државата и оние кои и ја градат европската иднина.