Заев: Сега е време да се препознае моментот земјите од Западен Балкан да учествуваат во градењето на посилна ЕУ

Добивај вести на Viber

Претседателот на Владата на Република Македонија Зоран Заев, своите активности на Самитот на Европската Унија за Западен Балкан што се одржува во Софија, ги започна со учество на паралелните активности, со свое обраќање на меѓународната конференција „Демократија што испорачува: Откочување на потенцијалите на Западен Балкан десет години подоцна“.

Премиерот Заев, на конференцијата на која беше поканет од страна на организаторите Фондацијата Конрад Аденауер, и тинк-тенк организациите Центар за студии по демократија и Европски фонд за Балканот, во своето обраќање потсети дека граѓаните на Република Македонија срушија авторитарен режим со пенкало на избори и со решителна волја за враќање на демократијата.

„Успеавме да го направиме она што честопати се стремат да го направат многу земји ширум светот, но ретко успева“, нагласи премиерот Заев.

Сепак, рече тој во својот говор пред аудиториуомот на конференцијата „Демократија што испорачува: Откочување на потенцијалите на Западен Балкан десет години подоцна“, надминувањето на кризата беше само половина од приказната.

„Требаше да отвориме нови перспективи. Затоа, создадовме систем на добро владеење кој се заснова на четири столба.

Инклузивното управување е првиот столб. Ова значи дека сме цврсто решени да изградиме независни институции, владеење на правото што е еднакво за сите и да ги прошириме инклузивните и достапни јавни услуги. Концептот "Едно општество за сите" е наш втор столб. Тоа е концепт на заснован на основите на општество на граѓаните за премостување на етничките поделби, за да ги елиминираме етничката и националистичката поларизација“, нагласи Претседателот на Владата на РМ Зоран Заев.

Премиерот Заев потоа се задржа и на елаборацијата на третиот столб на нововостановениот систем за обнова за добро управување - рамномерниот раст.

„Воведовме политички мерки за искоренување на сиромаштијата и за зголемување на животниот стандард. Во првите шест месеци од владата ја зголемивме минималната плата, ги направивме подостапни јавните услуги, воведовме повеќе програми за самовработување, зголемена поддршка и стимулации за малите и среднни претпријатија и обезбедивме еднакви можности за домашните и странските инвеститори. Денес владата во Република Македонија поддржува до 50% од секоја нова инвестиција во земјата“, потенцираше премиерот Заев.

Во продолжение на своето обраќање на конференцијата „Демократија што испорачува: Откочување на потенцијалите на Западен Балкан десет години подоцна“, како една од паралелните активности во Софија, Република Бугарија, за време на Самитот на ЕУ за Западен Балкан, Претседателот на Владата на Република Македонија посебно се задржа на добрососедските односи, односно на поврзувањето во регионот, која воедно е главна тема на Самитот во организација на Владата на Република Бугарија, како претседавач на ЕУ во тековниот мандат.

„Донесовме нов дух во односите со соседите. Отворивме дијалог за решавање на проблемите. Градиме мостови за соработка врз основа на взаемна доверба и почит, и постојано инсистираме да се оствари победа-победа за сите билатерални прашања“, истакна во завршницата на своето обраќање премирот Заев, и информираше дека во тој дух се остваруваат разговорите со Грција во врска со "проблемот со името", и дека се во многу напредна фаза.

Претседателот на Владата на Република Македонија Зоран Заев го афирмираше и на оваа конференција ставот дека нашата земја нема алтернатива за полноправното членство во ЕУ и НАТО, и дека амбицијата на Република Македонија е покана за влез во НАТО и започнување на преговори за пристап со ЕУ во 2018 година.

„Со ново и силно лидерство во регионот и со поддршка на европските лидери да ја креираме иднината на Балканот. Сега е време да се препознае моментот земјите од Западен Балкан да учествуваат во градењето на посилна ЕУ“, потенцираше премиерот Заев на конференцијата „Демократија што испорачува: Откочување на потенцијалите на Западен Балкан десет години подоцна“.