Захарова ги искара Србите, тие ја потсетија дека само Србија не воведе санкции за Русија

Добивај вести на Viber

Руските и српските власти си разменија остри зборови. 

Министерството за надворешни работи на Србија изрази изненаденост од коментарите на портпаролката на руското Министерство за надворешни работи, Марија Захарова, по повод изјавата на претседателот на Србија, Александар Вучиќ, за продажбата на муниција на Европската Унија — дури и по цена таа да заврши во Украина.

Захарова претходно денеска изрази надеж дека Србија ќе остане доследна на своите ветувања и нема да ја вооружува Украина, нагласувајќи дека „српскиот лидер дава едни изјави кога е во Москва, а сосема други во други региони, што создава впечаток дека во Србија можеби постои уште еден претседател Вучиќ“.

Таа потсети дека Србија повеќепати нагласила оти извозот на муниција е под строга контрола и дека нема да биде испорачувана на Украина.

„Повеќепати, вклучително и на највисоко ниво, од раководството на Србија сме добивале уверувања дека извозот на муниција од српско производство е под строга контрола и дека таа стока нема да се испорачува на Украина, за Киев да не може да ја користи против нашите војници“, истакна Захарова.

Државната секретарка во српското МНР, Невена Јовановиќ, во објава на Икс што медиумите ја добија од министерството, посочи дека Србија не испорачува оружје и воена опрема на страните во вооружени конфликти било каде во светот, дека е суверена и независна држава што своите одлуки ги донесува во согласност со националните интереси, и дека од пријателските држави и нивните претставници српските власти очекуваат почитување на таа фактичка состојба.

„Ја потсетуваме Захарова дека токму благодарение на претседателот Александар Вучиќ, Србија е единствената земја во Европа, надвор од Заедницата на независни држави, што не воведе санкции кон Руската Федерација. Таа одлука не беше ниту лесна ниту едноставна, но беше донесена од убедување дека историските пријателства не се напуштаат под притисок“, напиша Јовановиќ.

Јовановиќ додаде дека Србија, и покрај исклучително сложениот меѓународен контекст, ги задржала отворените канали на соработка со Русија, вклучувајќи ги и редовните директни авионски линии кон повеќе руски градови, и дека поради Русија од 2021 година не отворила ниту едно поглавје во пристапниот процес кон Европската Унија, иако, како што тврди, можела.

Јовановиќ напиша дека не е првпат Захарова да користи реторика која „не го одразува духот на односите што постојат меѓу државите и народите“.

Руската инвазија на Украина почна на 24 февруари во 2022 година.