ЖЕЛБА ЗА 2021 ГОДИНА – Проф. д-р. Никола Пановски: Посакувам медиумите да се вратат на вообичаените теми, а мене да ме заборават

Добивај вести на Viber

Многу надежи за подобра година, многу посакувања, како никогаш досега очекувања да е подобра од претходната. Во 2021 година влегуваме сите со заедничка желба - овој здравствен предизвик да заврши. Пандемијата ги помести нашите очекувања, нашите приоритети се други, сите други желби имаат помала вредност. 2020 има лош знак, иако можеби за многумина беше и успешна. Успех е и да се зачува здравјето, да се помогне некому, добра работа е да се предизвика нечија насмевка. Такви луѓе има многу. Во деновите пред и по стартот на новата година Фактор објавува новогодишни изјави од медицински експерти, стопанственици, банкари, политичари – сите зборуваат за нивните очекувања од следната година.

Микробиологот, проф. д-р. Никола Пановски, еден од најприсутните во јавноста во годинава што изминува, посебно со неговата стручност заради што со своите ставови остро се спротивставуваше на здравствените власти, а истовремено упатуваше и безброј апели до граѓаните, за следната 2021 година посакува ковид да биде кон крајот на вестите во дневно-информативните изданија.

-Посакувам што побрзо да се смири пандемијата. Да почне долгото опоравување на економијата. Ковид-19 да биде десетта вест еднаш во неделата, да нема повеќе трауми, страв, паника и смртни случаи. Медиумите да се вратат на вообичаени теми од животот, а мене да ме заборават. Посакувам да си ги гушнам четирите внучиња, станот пак да ми се наполни со гости. Посакувам матурата од син ми да ја можаме да ја прославиме како што доликува. Посакувам да го избере факултетот кој најмногу му одговара и да се запише без проблеми.  Во годината што доаѓа, 2021 очекувам да има континуирано намалување на бројот на активни случаи од Ковид-19, очекувам успешна вакцинација, со минимални несакани дејства и мирно лето. Се надевам дека од септември животот повторно ќе се врати на старото нормално. Децата ќе тргнат на училиште, студентите ќе облечат мантили, амфитеатрите ќе се наполнат. Очекувам да ги гледам студентите додека предавам, сакам да ја видам нивната реакција на тоа што е кажано, да можам да оценам дали им е интересно, дали го разбираат тоа што им го објаснувам. Очекувам нашите здравствени херои од Ковид-центрите, да го добијат заслужениот одмор, да се опорават физички и психички и да ја добијат заслужената сатисфакција, вели проф. Пановски за Фактор.