ЗИМАТА ГИ ПРАЗНИ ЕВРОПСКИТЕ СКЛАДИШТА: Резервите на гас се трошат со рекордна брзина

Добивај вести на Viber

Европа ги троши резервите на гас побрзо отколку кога било во последните седум години бидејќи студеното време ги зголемува потребите за греење, а температурите се очекува повторно да се намалат оваа недела.

Огромните подземни складишта во Европа се полни нешто повеќе од 70%, во споредба со околу 86% пред една година. Иако не постои ризик од моментален недостиг, брзото исцрпување би можело да го направи складирањето залихи потешко пред следната грејна сезона и ризикува да влијае на краткорочните цени.

Нивоата на складирање паднаа за вкупно 25 процентни поени од нивниот врв - повеќе од било кој пад од 2018 година, според податоците од Гас Инфраструктура Европа, собрани од Блумберг.

„Колку се пониски нивоата на складирање на крајот на март, толку потешко ќе и биде на Европа повторно да ги наполни пред следната зима“, рече Саманта Дарт, шеф на истражување во групацијата Голдман Сакс.

Времето стана постудено низ поголемиот дел од северозападна Европа, што би можело да поттикне дополнително празнење на складиштето во наредните денови, бидејќи потрошувачката на гас за греење се зголемува. Европа, исто така, е се повеќе изложена на нестабилноста на пазарот, бидејќи се потпира на глобалниот течен природен гас за да го надомести недостатокот што го остави престанокот на транзитот на рускиот гас преку Украина.

Непланираните прекини кај главните добавувачи може да влијаат на кревката рамнотежа во регионот и да влијаат на промените на цените. Во Норвешка, фабриката за ЛНГ „Хамерфест“ ја прекина работата до 9 јануари поради дефект на компресорот.

Цените се зголемија за четири отсто минатата недела и се блиску до нивоата што не се забележани во последните 14 месеци бидејќи пазарот се бори со намалените залихи.

Холандските фјучерси, европскиот репер за гас, благо ослабнаа во понеделникот, паѓајќи за 1,2% до 49,05 евра за мегават-час во 8:49 часот во Амстердам.