ДЕРКОСКИ КУРТУЛИ - Обвинителот не докажа дека злоупотребил висока сума при јавните набавки
Објавено во: Македонија 14 Јули, 2023
Поранешниот претседател на Државната изборна комисија, Оливер Деркоски, обвинет за злоупотреба на службената положба доби ослободителна пресуда денеска во Основниот кривичен суд во Скопје.
Покрај Деркоски, ослободени од обвинение беа и тројцата вработени во ДИК и еден управител на економски оператор кои се товареа дека извршиле „злоупотреба на службена положба и овластување“ при спроведување на две јавни набавки, при што се тврдеше дека го оштетиле Буџетот за 1.312.409 денари или околу 21 илјада евра.
Според Судечкиот совет, јавниот обвинител не докажал надвор од разумно сомневање дека обвинетите ги сториле делата за кои што се товарат.
Според обвинението, тројцата вработени во ДИК, како членови на Комисијата за јавни набавки не го почитувале минималниот законски рок за поднесување понуди, не утврдиле дека економскиот оператор ДУНА ДОО Скопје не ги исполнува условите за учество во постапката и притоа не спровеле правилна постапка за евалуација на доставените понуди, туку понудата ја оцениле како прифатлива и доделиле максимален број на бодови.
Процесот го водеше судијата Илија Трпков.
Фото: МИА