32 милиони денари за реконструкција на средните училишта

Добивај вести на Viber

Градоначалникот на Град Скопје Коце Трајановски денеска го посети СУГС „Панче Караѓозов“ каде во текот на летниот распуст ќе се изврши рекострукција на покривот на училишната зграда.

- Град Скопје како и изминатите години, така и годинава од својот буџет  издвои  околу 32 милиона денари за реконструкција на 21 средно  училиште  во текот на летниот распуст. Од овие средства, 18 милиони денари ќе се инвестираат во проекти кои ќе ја подобрат енергетската ефикасност на училиштата, односно ќе се изврши замена на столаријата и реконструкција на старите покриви  на училишните објекти, рече Трајановски.

Преостанатите средстава, како што рече, ќе се искористат за реконструкција на санитарните јазли, замена на дотраената електрична инсталација и реконструкција на подовите во  училниците и во фискултурните сали.

- Од овие средства, 5 милиони денари ќе се инвестираат во ова училиште каде ќе биде извршена целосна замена на покривот на училиштето и на учениците ќе им се создадат услови за одржување квалитетна настава. Можете да видите дека некои од училниците по вчерашните обилни дождови се во толку лоша состојба што не можат да се користат за одржување  настава, истакна Трајановски.

Минатата година за покривање на дел од училишната зграда на СУГС „Панче Караѓозов“ се потрошени 1,5 милиони денари. При овој зафат со ребреста лимарина  е покриена површина од 520 метри квадратни.

Оваа година ќе се покријат двете ламели каде се сместени училниците, кои се со површина од 1.450 метри квадратни и 825 метри квадратни, односно со вкупна  површина од 2.275 метри квадратни.