50 милони евра штета годишно од дивите копачи на песок!

Добивај вести на Viber

Потребни се нови и квалитетни измени на Закон за минерални суровини и спречување на нелојалната конкуренција од дивите експлоататори на песок и чакал од речните корита. Ова го побара Македонската асоцијација на рударство од каде што посочуваат дека годишните штети од нелегалниот бизнис достигнуваат 50 милиони евра. Освен финансиските загуби за државата, поважни се штетите кои тие ги прават на речните корита, особено на Вардар и на Црна Река, каде што има најмногу диви сепарации за песок, посочуваат од Асоцијацијата.

„Се соочуваме со двојна штета, нелојална конкуренција од една страна, која му пречи на легалниот бизнис вршејќи повеќекратни злоупотреби, како и дискутабилен квалитет на градење зашто не секогаш или скоро никогаш не се контролира квалитетот на песокот и чакалот од реките“, истакна денеска претседателот на Асоцијација на рударство, Николајчо Николов.

Според Николов, дополнителен проблем се и ригорозните казни, како и високите глоби поради кои голем број од фирмите што легално ги плаќаат пропишаните давачки, добиле опомени и се на пат да ја загубат концесијата.

Инаку од Асоцијацијата потврдија дека прв пат по 17 месеци македонската индустрија, главно рударството, бележи значителен раст на обемот на производство. Посебно позитивен тренд остварува секторот вадење камен за градежништво кој моментно брои 206 компании, а вработува 12.940 лица со просечна плата од 22.423 денари.

Извозот во последните три години е намален за околу 50 милиони долари или 14 отсто, додека увозот е зголемен за 66 милиони долари или 20 проценти. Најмногу се извезува во регионот, Турција и Русија, а се увезува од Шпанија, Кина и Чешка.