Агелер: Ќе следуваат и други имиња на „црната листа“
Објавено во: Македонија 21 Јуни, 2023
Американската амбасадорка во земјава, Анџела Агелер, вели дека покрај струшкиот градоначалник Рамиз Мерко, на „црната листа“ на САД ќе има и други имиња. Таа рече дека процесот на прогласување на лица за „нон грата“ се прави внимателно и се заснова на факти.
„Само ќе додадам дека за овие ознаки е потребно време, тие се внимателно проследени со процес на правен преглед, што значи дека не се лесни, не се брзи и во одреден момент се разгледуваат од голем број институции, како што е нашата правна канцеларија на САД“, изјави Агелер.
На прашањето кога се очекува да бидат објавени другите имиња, Агелер рече дека поради чувствителноста на процесот не може да зборува за одредено време.
„Не можам да зборувам за време, за изјави во иднина. Верувам дека ќе има други, но кога ќе има, не можам да кажам, бидејќи овој процес е внимателен, но можеме само да нагласиме дека ние во САД му пристапуваме на ова многу сериозно“, изјави Агелер.