Ахмети за „Катимерини“ објасни како може да се реши името
Објавено во: Македонија 28 Јануари, 2018
Претседателот на ДУИ, Али Ахмети во интервју за грчкиот весник „Катимерини“ предлага спорот за името да се реши според моделот на Договорот за добрососедство со Бугарија, со консензус меѓу двете Влади, а потоа ратификација во двете собранија.
Под наслов „Решение сега, без референдум“, неделното издание на „Катимерини“ ги пренесува ставовите на Ахмети за ова отворено прашање.
Тој вели дека подобро време за договор од сега не постои и објаснува дека Владата ќе преговара за да се постигне договор, а не само за да преговара.
Во однос на предлозите и идеите на Нимиц, вели дека Владата заедно со опозицијата ги разгледува и се обидува да има позитивен и конструктивен пристап. Ахмети објаснува дека терминот „Македонија“ бил дел од предлозите и во 2008 во Букурешт, но и во 2011, во рамките на предлогот „Република Северна Македонија“.
„Терминот Македонија во името на нашата земја не претставува закана за територијалниот интегритет и суверенитет на Грција“- вели Ахмети за „Катимерини“.
Тој им порачува на Грците да бидат сигурни дека Македонија нема никаква територијална или каква било друга претензија од нивната земја, и дека е апсурдно да се претпоставува такво нешто.
Ахмети предупредува дека не решавањето на проблемот може да ги негува старите ставови за нови граници на Балканот.