Ако по пандемијата планирате работа во странство, еве каде во Европа има највисоки плати

Добивај вести на Viber

Доколку по завршување на пандемијата на коронавирусот планирате да одите на печалба, скандинавските земји имаат највисоки плати.  

Иако македонските граѓани масовно заминуваа изминативе години во Германија, сепак оваа земја не е лидер по висината на платите во европското семејство.  Евростат објави во која земја колку изнесува просечната плата, при што на врвот е Данска. Оваа земја има просечна плата од 4.057 евра, а зад неа е Луксембург со плата од 3.671 евра месечно, проследено со Шведска (3.135 евра), Белгија (3.092 евра), Ирска (3.021 евра), Финска (2.958 евра) и Германија (2.891 евра). Износот на платите е многу важен фактор за луѓето кои заминуваат на работа во странство.

„Данска и Шведска се земји со високи плати. Апсолутно платите се важен фактор, но луѓето ја гледаат и социјалната инфраструктура во таа држава. Бираат целосен пакет каде ќе заминат, затоа што во високо развиените земји грижата за граѓаните е на едно многу високо  ниво“, изјави Донка Спасовска од агенцијата за посредување при вработување „Хоризонт“.

Македонците кои работат во Луксембург се презадоволни од она што земјата го нуди.

„Се сеќавам првиот месец на работа овде ми стигна плата колку за цела година во Македонија. Мојата сопруга е овде, и најдобро беше да останеме. Здравството и администрацијата се на врвно ниво. Не е се во платата, но по статистика Луксембург има висока плата во однос ЕУ и пошироко. Но, сепак за многу луѓе таа не е доволна за купување на куќи, станови поради високите цени, посебно за поединци што се дојдени на печалба“, вели Македонец кој живее во Луксембург.

Балканските земји кои се членки на ЕУ немаат високи плати. На дното во ЕУ е Бугарија со својата просечна месечна заработка од 442 евра.  Романија има просек од 700 евра месечно, Унгарија следи со 801 евро и Литванија  со 809 евра.

foto freepik