Ако станарите не можат да се договорат – ќе мора да најмат управител

Добивај вести на Viber

Помалку од половина од зградите во земјава имаат пријавено совет на станари или земено управител кој ќе се грижи за функционирањето на зградата. Од 10 илјади згради, 4 600 згради го испочитувале законот, од кои што 1.600 одлучиле си земале управител, а 3.000 проблемот го решиле со заедница на станари. Оние кои сеуште не го регулирале ова прашање, министерот за транспорт и врски Миле Јанакиески ги повика да се регистрираат. Засега не се казнува, посочи тој и информираше дека од 80, само 30 општини имаат инспектори за домување. „Ако на почетокот тенденцијата беше станарите да формираат заедница на станари, сега повеќе се ангажира управител. Во последните година дена драстично е зголемен бројот на зградите со кои управуваат лиценцирани управители“, истакна Јанакиески. За оние згради што го немаат средено ова прашање, по службена должност ќе може да се назначи управител, а доволно е само еден од станарите да поднесе барање до надлежниот основен суд. Јанакиески најави кампања за информирање на граѓаните за можноста да поднесат барање до Основниот суд Скопје 2 за назначување на управител, ако неможат да се договорат со останатите станари Според податоците кои ги објави Министерство за транспорт и врски во Комисијата за домување стигнале 75 барања за посредување во спорови.