„Ал Шабаб“ ја презеде одговорноста за нападот на универзитет во Кенија

Добивај вести на Viber

Во Кенија повеќе студенти се земени како заложници во универзитетскиот комплекс во градот Гариса, Источна Кенија. Рано утринава околу 30 маскирани напаѓачи упаднале во кампусот. Во моментот се знае за 15 загинати. Не се соопштува точниот број на оние кои се внатре, но во комплексот живеат стотици млади луѓе.

Според информација на кенискиот Црвен крст меѓу 27 и 50 студенти успеале да избегаат. Очевидците тврдат дека напаѓачите отвориле неселективно пукање со што се зголемува веројатноста бројот на жртвите да биде поголем. Двајца од загинатите биле чувари на комплексот.

Започната е операцијата за ослободување на заложниците. Полициски и воени единици го опколиле кампусот, се собрала и голема толпа од роднини и пријатели на учениците, кои инсистираат да разберат што се случува. Некои од нив се обиделе и да влезат во комплексот, но биле запрени.

Повеќето продавници во Гариса се затворени и луѓето се заклучиле во своите домови во очекување на расплетот.

Сомалиската исламистичка група „Ал Шабаб“, која е дел од „Ал Каеда“, ја презеде одговорноста за нападот.

Внатре во кампусот учениците биле поделени на муслимани и немуслимани. Ослободени се 15 од муслиманите.

По последна информации еден од терористите е уапсен при обид за бегство.