Македонските возови останаа и без патници и без стока!

Добивај вести на Viber

Алармантна е состојбата во „Македонски железници“. Инфраструктурата, локомотивите, патничките и товарните вагони се во очајна состојба, а тоа го покажуваат и најновите статистички податоци кои регистрираа континуирано намалување и на бројот на патници и на обемот на превезена стока. Суровата статистика покажа што се случува кога не се издвојуваат пари за одржување на возовите и не се инвестира во нова железничка инфраструктура. Ако во 2004 година МЖ Транспорт располагала со 57 локомотиви, лани останала со само 53. Уште потрагична е состојбата со патничкиот возен парк, затоа што од 135 патнички локомотиви во 2004 година, патниците лани имале на располагање само 61. И Светска банка потврди за речиси минорните вложувања на државата во железничката инфраструктура. Во последните 10 години само 8% проценти од македонските пруги биле обновени, а во истиот период државата набавила само 4% од локомотивите со кои располагаат „Македонски железници“. Наместо модернизација и инвестиции, македонската железница тоне во долгови, штрајкови и превработеност. Преполовен обемот на превезена стока со железницата Најголемите извозници во Македонија, кои се и најмногу зависни од железничкиот транспорт, трпат огромни штети поради застарените пруги и бавни возови. Бизнисмените се жалат дека инфраструктурата е еден од најгорливите проблеми затоа што земјава има исклучително слабо железничко поврзување, а најголем дел од индустријата зависи од масовниот превоз. Иако железницата треба да претставува најевтин и најбрз начин преку кој компаниите ќе ги превезуваат стоките, само 8% од вкупниот транспорт на стока во земјава се врши со железницата. Тоа е така затоа што нефункционалните и застарени пруги им нанесуваат огромни штети на компаниите, бидејќи нивните производи не стигнуваат на време до клиентите. Ова го потврдува и државната статистика која објави дека во 2008 година извозниците превезле 518.292 тони стока, а лани обемот на превезена стока бил речиси преполовен изнесувајќи 283.734 тони. Најмногу е намален обемот на железнички транспорт на земјоделски производи и нафта, а во речиси незначителен обем се превезувале прехранбени производи, транспортни средства и мебел. ТАБЕЛА: Превезени патници и стока со Железница Многу ветено, малку реализирано! Изградба на пругата кон Бугарија и кон Албанија, модернизација на дел железничкиот Коридор 10 - сето ова го има во владината програма, но повеќе од шест години овие проекти останаа на хартија. Дури пред два месеци, Владата се осмели и позајми пари од Европската банка за обнова и развој за обнова на дел од пругите. Во најавениот инвестициски циклус од 14 милиони евра планирана е модернизација и ремонт на железничката делница од Коридорот 10. Притоа, МЖ Транспорт позајми 50 милиони евра, кредит од Европската банка за обнова и развој за набавка на шест патнички воза и нови 150 вагони, но тендерската постапка за набавка на истите се уште трае, па за нови возила ќе почекаме следната година. Освен МЖ Транспорт, речиси иста сума од ЕБОР  позајми и МЖ Инфраструктура за надградба на 30 километарската делница, дел од Коридорот 8 кој треба железнички да ја поврзе Македонија со Албанија на запад и со Бугарија на исток. Но, како што пишува и во Манифестот на Владата, овие крупни и стратешки проекти ќе бидат завршени дури во 2020 година, а до тогаш компаниите ќе продолжат да плаќаат бавен а скап железнички транспорт. Соња Јованова Наумовска