Албафоне за македонските Албанци?!

Добивај вести на Viber

Во Македонија за еден месец ќе се појави нов мобилен оператор кој ќе биде насочен кон Албанците во Македонија, Албафоне.

Од менаџментот на компанијата велат за почеток во оптек ќе пуштат 50 илјади броеви со префикс 073. Примaрна таргет група ќе им бидат Албанците. „Албанските корисници ќе ги третираме онака како што заслужуваат, рамноправно, со почит и на мајчиниот јазик“, изјави денеска Ардиан Хоџа, извршниот директор на Албафоне.

Роберт Орданоски од Агенцијата за електронски комуникации на Македонија објасни дека Албафоне е мала, но сериозна фирма која ќе ја зголеми конкуренцијата на пазарот, а веќе потпишала и договор со АЕК.

АЕК неодамна потпиша и договор со Косовскиот регулатор за решавање на проблемот со мешање на сигналот со косовските мобилни оператори и македонските. Според Ордановски договорот е во фаза на реализација што значи дека мобилните оператори базните антени треба да си ги завртат кон своите држави за во иднина да нема мешање на сигналите, а со тоа и повисоки сметки од роамниг.

Инаку, моментално во Македонија 49 проценти од  корисниците на мобилна телефонија припаѓаат на Т-мобиле, 28 отсто се корисници на ВИП, а останатите 23 проценти од граѓаните ги користат услугите на ОНЕ.