Ангел Наков: Да затвораш мали бизниси кога сите ги укинуваат сертификатите ги надминува сите граници
Објавено во: Македонија 06 Февруари, 2022
Ангел Наков, предводникот на успешниот референдум во Гевгелија во 2017 за неотворање на рудници за злато на Кожуф, реагира дека полицијата и останатите надлежни органи да не затвораат повеќе мали угостителски објекти и други и други семејни бизниси поради ковид-сертификати. Повикува на граѓанска непослушност против, како што вели, бирократите од Скопје.
Според поранешниот прв човек на ски-центарот Кожуф, нема логика да се уништува нечија егзистенција во време кога повеќе европски земји ги укинуваат сертификатите. Ваквата реакција на Наков следува откако денеска беше објавено дека полициски службеници од Одделот за криминалистичка полиција и инспектори од СВР Скопје, заедно со Управата за јавни приходи и Државниот пазарен инспекторат извршиле контрола во 14 угостителски објекти во Гевгелија и село Мрзенци.
Два угостителски објекти се запечатени од страна на Државен пазарен инспекторат поради затекнати лица без сертификати, односно непочитување на ковид протоколите.
„Ова ги надминува сите граници. Да затвараш мали бизниси во време кога народот едвај сврзува крај со крај, е равно на злосторство против својот народ. Дали тој што издал таква наредба е нормален човек? Како ја одбраа Гевгелија?
Не знам кој се затворените и казнети угостителски објекти, но цела Гевгелија треба да застане против оваа сегрегација. Во време кога цел свет ги укинува мерките против „короната“, некои имбицили кои зимаат плата од нас, си играат со егзистенцијата на граѓаните.
Да се организираме и изразиме солидарност со нашите сограѓани и граѓанска непослушност против бирократите во Скопје“, повика Наков.