„Арбен Џафери“ ќе ја чека новата косовска влада

Добивај вести на Viber

Официјалниот старт на градежните работи беше означен уште на трети јули, но автопатот од Приштина до Блаце, односно до границата со Македонија, уште не се гради. Американско-турскиот конзорциум „Бехтел-Енка“ ќе го чека формирањето на новата косовска влада, бидејќи стравува дали потпишаниот договор со Владата на Хашим Тачи, во заминување, е валиден или не. Одлуката да не се почнува со работите на изградбата на автопатот ја донесе раководството на конзорциумот, откако правниот тим го анализирал косовското законодавство и ги советувал да не почнуваат со градежните работи. Постизборната коалиција на Демократскиот сојуз на Косово, Алијансата за иднината на Косово и Иницијативата за Косово, која смета дека има право да ја формира новата влада, веќе најави дека сите договори потпишани од владата во заминување ќе бидат разгледани и поништени. Според косовските медиуми, Владата на Тачи не соопштила детали од потпишувањето на договорот, поради што оправдано е сомневањето дека можни се големи проблеми со новата влада, доколку таа договорот го прогласи за невалиден. Важниот инфрастуктурен проект е вреден 820 милиони евра и го носи името на почесниот претседател на ДПА, Арбен Џафери. Автопатот требаше да биде готов до крајот на 2017 година. Почетокот на неговата изградба го поздравија и многу политичари од Македонија.