Со жив штит архитектите ќе го бранат ГТЦ од барок

Добивај вести на Viber

„Го сакам ГТЦ“ е иницијативата со која Асоцијацијата на архитекти на Македонија организира  потпишување на петиција против менување на изгледот на Градскиот трговски центар на 14 јуни, а воедно и протестен собир истиот ден во 19 часот.  ААМ повикува стручната јавност и граѓаните со жив штит да застанат во одбрана на ГТЦ од обидот за негово обезличување. Од асоцијацијата  во наредниот период планираат  и научен симпозиум во врска со континуираното нарушување на препознатливиот изглед на центарот на Скопје, но и поради прекршувањето на загарантираните права на архитектите врз сопствените дела. Архитектонската фела се одлучи да поднесе барање до Комората на овластени архитекти и инженери на Р.М. за одземање на овластувањата за проектирање на архитектите Жарко Чаушевски и Филип Богатинов чие идејно решение победи на распишаниот конкурс од страна на раководството на ГТЦ. Од ААМ упатуваат порака до сите граѓани и организации да се вклучат во протестниот собир со креативни и остварливи предлози. Според македонската законска регулатива, архитектите имаат морални права кои го штитат авторот и интегритетот на делото. Секој архитект има право да се спротивстави на менување, деформирање или сакатење на делото што може да наштети на неговата личност, чест и углед, како и на уништување на делото. Моралните права на авторите важат и по нивната смрт и истите се штитат од наследниците, соодветното здружение на автори или Македонската академија на науките и уметностите. Авторот на победничкото идејно решение за ГТЦ во своја одбрана, Жарко Чаушевски пред неколку дена обвини за дилетантизам и елементарно непознавање на струката од страна на претседателката на ААМ, притоа потенцирајќи дека не би можел да биде член на таква организација. Во идниот изглед на ГТЦ  е предвидена реализација на фасада во стилот на „Скопје 2014“, три куполи, десетици антички столбови и тераса со бројни скулптури на последниот кат од објектот.