АТЕНТАТ НА АЈАТОЛАХОТ ХАМНЕИ ЌЕ СТАВИ КРАЈ НА ВОЈНАТА ИРАН-ИЗРАЕЛ: Нетанјаху не ја исклучува можноста за ликвидација на верскиот лидер

Добивај вести на Viber

Израелскиот премиер Бенјамин Нетанјаху во интервју за ABC News изјави дека не ја исклучува можноста за атентат врз врховниот лидер на Иран, ајатолахот Али Хамнеи, тврдејќи дека таков потег „нема да го ескалира конфликтот, туку ќе го заврши“.

Нетанјаху: Ова е за заштита на човештвото

Кога директно го прашаа дали Израел ќе го таргетира врховниот лидер, Нетанјаху одговори: „Правиме она што мораме. Веќе ги таргетиравме нивните водечки нуклеарни научници. Беше како нуклеарниот тим на Хитлер. Сè уште имаме работа на други локации“, додаде тој.

Нетанјаху, исто така, изјави дека нападите на Израел врз Иран имаат за цел, како што рече, „заштита на човештвото“ од иранската нуклеарна закана.

„Денес целта е Тел Авив, утре може да биде Њујорк“, рече Нетанјаху. „Ја разбирам политиката „Америка на прво место“, но не ја разбирам „Америка мртва“.

Трамп наводно го отфрлил израелскиот план за атентат

Претходно, Ројтерс објави дека американскиот претседател Доналд Трамп го отфрлил израелскиот предлог за атентат врз ајатолахот Хамнеи, повикувајќи се на двајца високи американски претставници. Според нивните тврдења, предлогот бил изнесен во последните неколку дена, но Трамп ставил вето на планот.

Нетанјаху ги негираше тврдењата во интервју за „Фокс њуз“: „Постојат многу лажни извештаи за разговори што никогаш не се случиле и нема да навлегувам во тоа. Но, можам да кажам дека ќе направиме што треба да направиме. И мислам дека Соединетите Држави знаат што е добро за нив.“

Тој додаде дека израелските напади ќе престанат само кога ќе бидат отстранети сите ирански нуклеарни капацитети.

Ајатолахот Али Хамнеи, кој има 85 години, е врховен лидер на Иран од 1989 година и е најмоќната политичка и религиозна фигура во земјата. Неговиот авторитет ги надминува сите други институции, вклучувајќи ги претседателот и парламентот, и тој игра клучна улога во обликувањето на надворешната политика и нуклеарната програма на Иран.