Атина ќе ги оданочува богатите грци во швајцарски банки

Швајцарија е подготвена да почне формални преговори со Грција за постигнување договор за оданочување на средствата кои богатите Грци ги имаат на тајни сметки во швајцарските банки. Швајцарската влада соопшти дека усвоила мандат за преговори по консултации со неколку парламентарни комисии. Двете влади веќе неколку месеци имаат првични дискусии за ова прашање. -Берн и Атина се стремат кон брзо склучување договор, сличен на договорите со Германија, Велика Британија и со Австрија, се вели во соопштение на швајцарската влада. Една од главните теми во Грција, особено со влошувањето на рецесијата, е таканаречената „Лагард листа“, именувана според шефицата на ММФ, Кристин Лагард, која ги содржи имињата на повеќе од 2.000 Грци кои имаат сметки во швајцарски банки. Лагард во 2010 година, додека беше министерка за финансии на Франција, на власта на неколку земји од ЕУ им предаде информации за затајувачи на данок. Каков било договор со Швајцарија може да помогне во пополнувањето на некои дупки во буџетот на Грција со изрекување казни за постоечките салда и со данок на добивка за следните вложувања. Швајцарската влада сака да склучи такви договори за оданочување како алтернатива на автоматска размена на банкарски информации, во обид да ја одбрани тајноста, која е клучна за нејзината индустрија за офшор-богатство, вредна две илјади милијарди долари. Информациите за наводните даночни измамници на „Лагард листата“ налутија многумина кои веќе беа бесни поради немоќта на грчките влади да се справат со богатите Грци, додека неколкугодишната рецесија збриша една петтина од економијата и тешко ја погоди средната класа. Според извештај на ЕУ објавен минатата година, неплатените даноци во Грција изнесуваат околу 60 милијарди евра, износ еднаков на околу една четвртина од нејзината економија и повеќе од шестина од долгот на земјата. Денес не е јасно колку пари може да собере Атина со данокот на добивка. Според студија од 2009 година, Грците во швајцарските банки имаат непријавени околу 24 милијарди швајцарски франци. Најверојатно, таа сума е зголемена со оглед на влошувањето на економската ситуација во Грција. Швајцарија веќе има потпишано договори за оданочување со Велика Британија, Австрија и Германија, а во тек се преговори и со Италија. Меѓутоа, судбината на германскиот договор сега е во рацете на Бундесратот, горниот дом на германскиот Парламент, каде што владата на канцеларот Ангела Меркел нема мнозинство. Опозициските социјалдемократи се заканија дека ќе го блокираат договорот, велејќи дека е премногу попустлив за затајувачите на данок.