Добивај вести на Viber
Австриската компанија „Аса Интернационал“ се најавува како концесионер на првата регионална депонија во државата што ќе се гради во Василево. Според градоначалниците од југоисточниот плански регион, цената која е понудена за собирање и кладирање на отпадот што граѓаните ќе ја плаќаат кога депонијата ќе проработи е прифатлива. Договорот и официјално ќе треба да се потпише до крајот на годината.
Притоа руралните општини ќе плаќаат по 300 денари, а урбаните по 520 денари за одлагање на сметот. За правните лица ќе биде повисока оваа сума бидејќи тие се и создавачи на поголема количина на отпад, објасни Ванчо Стојанов, градоначалник на општина Василево.
Депонијата треба да почне со градба девет месеци по потпишување на договорот, кога треба да се прецизираат сите детали, а во првите пет години треба да вработи околу 8о лица, главно физички работници.
Првата регионална депонија во државата ќе биде изградена во близина на селото Добрашинци. Проектот чини 22 милиони евра, а ќе опфати површина од 12 хектари каде што идните 25 години треба да се депонира околу 1.200.000 метри кубни цврст отпад од вкупно десет општини.
Според најавите, изградбата на новата депонија треба да заврши на почетокот на идното лето.