Автопатот од Приштина до македонска граница ќе се вика „Арбен Џафери“

Добивај вести на Viber

Автопатот што денеска започна да се гради на Косово и кој треба да ги поврзе Косово и Македонија ќе го носи името „Арбен Џафери“, одлучија косовските власти. Во селото Угларе денеска започнаа работите на автопатот кој треба да ја олесни комуникацијата меѓу двете земји, а ќе чини околу 800 милиони евра. „Ефектот од развојот и изградбата на овој автопат нема да бидат само за Косово, туку тоа ќе биде битен ефект за економскиот развој на Косово и останатите земји од регионот“, рече вршителот на должноста косовски премиер Хашим Тачи, означувајќи го почетокот на градежните работи во косовско Угларе. На официјалниот старт на работите присуствуваше и македонскиот вицепремиер Муса Џафери, кој го нарече овој автопат „мост на поврзување меѓу Албанците“. „И честитам на Владата на Тачи која имаше смелост заедно со неговиот кабинет да преземе врз себе еден толку голем и скап проект и сигурен сум дека сите граѓани на Република Косово ќе го прифатат, бидејќи е многу важен“, рече Џафери. По завршувањето на делот во Косово, автопатот од граница треба да продолжи и кон Скопје. На косовска страна него ќе го гради турско-американски конзорциум, додека од македонска страна допрва треба да се распишува јавен повик.