БАНКИ: Граѓаните и фирмите чуваат 3 милијарди евра во скопска “Стопанска“, „Комерцијална“ и „Тутунска“!

Добивај вести на Viber

Трите најголеми банки во земјава „Стопанска банка Скопје“, „Комерцијална банка“ и „НЛБ Тутунска банка“ примиле депозити во вредност од 71,45 милиони евра од граѓани и компании во првите шест месеци годинава, покажува анализата на „Фактор“ направен врз основа на полугодишните биланси што ги објавија банките. Нивните кредитни пласмани во истиот период пораснале за вкупно за 63,5 милиони евра во овој период. Нивното агрегатно кредитно портфолио односно кредитните пласмани во земјава, според нивните објавени биланси, изнесува 2,15 милијарди евра. Наспроти тоа кај трите најголеми банки во земјава граѓаните и компаниите чуваат 3 милијарди евра. Споредбата на податоците од анализата покажува дека по критериумите: пласирани кредити, нето приходи од камата , нето добивка и вложувања во хартии од вредност прворангирана е „Стопанска банка Скопје“. Воедно таа банка е и најдобро рангирана во споредба со конкурентите и по критериумот „резервации за сомнителни и тешко наплатливи побарувања“ заради тоа што има најнизок износ на резервации. „Комерцијална банка“ е единствено подобра од „Стопанска банка Скопје“ според критериумот вкупен износ на депозити. Овде „Комерцијална банка“ е без конкуренција и во категоријата раст на депозити во периодов од шест месеци 2014 година. Кај неа коминтентите пласирале 35,55 милиони евра, што е речиси исто на збирот на сумите депозити што ги примиле „Стопанска банка“ Скопје и „НЛБ Тутунска банка“. „НЛБ Тутунска банка“ која генерално важи за најмала од трите најголеми деловни банки во земјава во првата половина на годинава успеала да ја надмине „Комерцијална банка“ во категориите: нето добивка, вкупен пласман на средства во хартии од вредност, во износ на резервирани средства за лоши и сомнителни пласмани како и во најзначајната категорија: кредитни пласмани. Р.Ф.