Бетон ќе гради нов подземен паркинг под платото на МНТ

Добивај вести на Viber

Градежната компанија „Бетон“ Скопје ќе работи на проширување на подземниот паркинг под платото на Македонската опера и балет (МНТ), како и на проширување на булеварот Христијан Тодоровски Карпош од ул. Џон Кенеди до ул. Романија. Според известувањата на градежната компанија, објавени на Македонската берза, Бетон склучила договор со Владата на РМ за изведување на градежни и градежно-занатски работи за изградба на подземно паркиралиште на локација Мал Ринг Скопје. Вкупната вредност на овој договор со вклучен ДДВ изнесува 572 милиони денари (9,3 милиони евра) Станува збор за подземна гаража на две нивоа, која е во рамките на проектот „Скопје 2014, под платото кај објектот на Македонската опера и балет, со што постоечкиот подземен паркинг ќе се прошири со нови над 350 паркинг места. Објектот ќе се изведува на градежна парцела со големина од 10.885 метри квадратни, а бруто развиената површина на идната гаража изнесува 21.770 метри квадратни. Со урбанистичкиот план е предвидено сообраќајниот пристап да биде олеснет и со новопроектирана подземна улица, која ќе се почнува од булеварот Гоце Делчев и ќе минува под постоечкиот празен простор меѓу објектот на Македонската филхармонија во изградба и музичко–балетскиот училишен центар „Илија Николовски – Луј“. Исто така, компанијата извести дека склучила и договор со Град Скопје за реконструкција и проширување на булеварот Христијан Тодоровски Карпош од ул. Џон Кенеди до ул. Рокомија. Вкупната вредност на овој договор со вклучен ДДВ изнесува 61 милион денари (99 илјади евра). „Бетон“, исто така, извести дека за кредитни линии по револвинг принцип, земени од „Стопанска банка, Скопје“, а со вкупна вредност од 26,6 милиони евра, има склучено договор за хипотека, договори за регистриран залог врз подвижни предмети и побарување (не е наведено на која сума), а има дадено и изјави за уредување права и обврски на меници