Битола продаде уште 7 парцели во индустриската зона Жабени

Добивај вести на Viber

Седум нови парцели за изградба на стопански објекти во индустриската зона Жабени се веќе продадени, информираше градоначалникот на Битола Владимир Талески, кој додаде дека општината продавала и градежно земјиште во градот за изградба на згради и куќи.

„Во индустриската зона Жабени продадени се седум парцели за стопанство со што вкупно досега се продадени 49 парцели во таа зона. Во текот на вчерашниот ден во населбата „Ушици“ се продадоа 3 парцели за индивидуално домување со што бројот на вкупно продадените парцели сега е 25, додека бројот на вкупно продадените парцели за домување во поранешната касарна е 85“, соопшти градоначалникот. На подрачјето на општина Битола, односно во поранешната касарна, во индустриската зона „Жабени“ и на граничниот премин Меџитлија продадени се 4 парцели за изградба на хотели, додека пак во непосредна близина на хотелот „Битола“ во овој град, во текот на вчерашниот ден по извршеното јавно наддавање продадена е парцела за изградба на станбен комплекс, односно колективно домување. Парцелите за индивидуално домување постигнале цени од 577 до 3.400 денари за метар квадратен, додека парцелата за колективно домување била продадена по цена од 4.160 денари за квадрат. Правилата за градба и користење на општинските бенефиции им наложуваат на инвеститорите во рок од 9 месеци да ја завршат процедурата за добивање дозвола за градба, а во рок од 6 години да го завршат и пуштат во употреба својот објект, појасни Талески.