Блокадата на рускиот гас преку Украина предизвика шок на берзите

Добивај вести на Viber

Блокадата на протокот на гас од Русија кон Европа преку Украина и воената акција на украинските сили во Русија ги потиснаа цените на резервите на гас на стариот континент на највисоко ниво од почетокот на годината.

Тргувањето на најголемата европска берза за гас во Холандија е затворено во петокот по цена од 41 евро за мегават-час, што е раст од 14 отсто од почетокот на неделата, пренесува SEEbiz.

Предвременото запирање на транзитот на гас преку Украина, во светло на упадот на украинските војници во југозападна Русија оваа недела, може да доведе до скок на зимските цени за дополнителни 17 отсто од сегашните нивоа на околу 50 евра за мегават-час. Пазарот дефинитивно реагира на заканата и таа не е занемарлива.

Вниманието на засегнатите страни на европскиот пазар на гас го привлече и информацијата дека украинските сили во својата кампања во рускиот регион Курск ја зазеле постројката за компресија на гас Суја во близина на истоимениот град. Монтелњуз пренесува информација од украинската компанија која стопанисува со гасоводи дека немаат сознанија за запленувањето на Суја и дека немало прекин на протокот на гас од внатрешноста кон Суја.

Иако, потсетува порталот, се очекуваше до крајот на годината да престане протокот на руски гас низ Украина, сегашната загуба на руското снабдување преку таа рута ќе ги намали очекуваните залихи на гас во европските магацини на крајот на октомври.

Во исто време, празнењето на залихите надвор од очекуваното темпо веројатно нема да биде проблем за претстојната грејна сезона, но неговото надополнување во 2025 година би било „многу тешко“, заклучува Монтелњуз.