Бомбона бизнис! „Фершпед“ најдобро ќе се заблажи од парите на „Европа“

Добивај вести на Viber

Најдобро ќе се заблажи „Фершпед“ кој има 21,77 отсто од акциите што значи дека ќе земе над 100.000 евра од дивидендата на „Европа“

Најстарата македонска кондиторска индустрија „Европа“ ќе подели нето дивиденда по акција во износ од 135 денари, објави компанијата. Ако се споредува со лани дивидендата годинава е повисока за 100 отсто!

Акцијата на „Европа“ на берзата не се тргувала подолго од една година во класично тргување, а според официјалните достапни податоци последната цена на акцијата била 3.145 денари.

Вкупниот износ на дивиденда е речиси 35 милиони денари или над половина милион евра.

„Европа“ од акционерски аспект е консолидирана компанија затоа што 5 акционери поседуваат над 75 отсто од акциите, а 10 отсто се во сопствен откуп на „Европа“ и за нив нема да биде исплатена дивиденда.

Најголем поединечен акционер е групацијата „Фершпед“ со 21,77 отсто од акциите. Оваа компанија ја помогна Сава Димитрова, долгогодишната директорка на „Европа“ во 2006 и 2007 година кога имаше напад за непријателско превземање на „Европа“ од страна на контроверзниот српски бизнисмен Јовица Стефановиќ – газда Нини.

Освен „Фершпед“ голем акционер е и шпедицијата „Макошпед“ која поседува 19 отсто од акциите и сега ќе добие добра финансиска инјекција од „Европа“. И „Макошпед“ помагаше во периодот на обидот за непријателско превземање. Кичевската фирма „Ас Сењак“ поседува 18 отсто од акциите и ги купи во периодот во последниве четири години.

Голем поединечен акционер е уште хрватската државјанка Мила Левентиќ која поседува 8,68 отсто од капиталот. Таа е наследник на акциите од нејзиниот татко Боро Левентиќ, кој го имаше застапништвото за производите на „Европа“ за земја или земји од нашиот регион. На листата е уште и косовскиот државјанин Есамедин Хасани кој е застапник на „Европа“ за косовскиот пазар.

Според достапните податоци 40 домашни физички лица поседуваат уште 10,5 отсто од акциите и тие ќе поделат дивиденда во износ од 50.000 евра.