БУЏЕТСКИ ПРИХОДИ: Кризата зема данок

Добивај вести на Viber

Во мај годинава буџетските приходи се пониски за близу 24 милиони евра во однос на април, говорат податоците на Секторот за трезор во Финансии. Тоа говори дека политичката криза си го зема својот данок, па така се намалуваат и приходите во буџетот.

Тоа беше причина за ребалансот на буџетот кој го најави новиот министер Миноски.

Буџетските приходи со ребалансот се намалени за 48,7 милиони евра, а буџетските расходи за 13 милиони евра. Со ребалансот на Буџетот, дел од агенциите и државните институции останаа со ист буџет, кај дел има кратење но кај дел од министерствата има раст на расходите. Со новиот Буџет ќе има повеќе пари за социјални транфери, плати и надоместоци додека најзначајно е кратењето на капиталните расходи за 45 милони евра.

„Господинот Миноски треба да го види  вистинскиот ребаланс и да знае дека во парламентот ќе предложи кратење на капиталните расходи за 45 милиони евра. Тоа е единствената вистина. Тоа е намалување од 10% од сумата која Ставрески ја планирал во буџетот за 2016 година. Овие средства се префрлаат во ставките за тековни трошоци и Миноски дури и наивно треба да се запраша зошто се потребни нови 18 милони евра за пензии и зошто не биле планирани со буџетот за 2016, ако зголемувањето е најавено од минатата година. Зошто се потребни нови 7,7 милиони евра за плати и придонеси? Зошто се зголемува ставката за камати по кредити за 18% или за 17,3 милиони евра? Зошто се зголемени патните и дневните расходи за 244.000 евра и сега се предвидени 15,5 милиони евра или 42,5 илјади евра дневно за патни трошоци и дневници доколку се работи 365 дена во годината, напиша во колумна за Фактор Кире Наумов од СДСМ.

Миноски: Ребалансот ќе биде одговор на ефектите од политичката криза

Најголемо кратење на трошоците се прави кај сумата предвидена за капиталните инвестиции. Со ребалансот на буџетот за оваа намена се предвидуваат  45 милиони евра помалку. Односно наместо првично предвидените 412 милиони евра, сега за капитални проекти  предвидени се 366, 9 милиони евра.

Намалување за 13,9 милиони евра има и кај износот за субвенции и трансфери, за што сега се планирани 224 милиони евра. За 1,7 милиони евра се намалуваат трансферите до општините, и за оваа намена сега се предвидени 271 милиони евра.

Но, истовремено се зголемуваат сумите предвидени за социјални трансфери и плати и надоместоци. Па така, за годинава со ребалансот се предвидуваат, 27,4 милиони евра повеќе за социјални трансфери, односно нивниот износ е планиран на сума од 1,454 милијарди евра.

Сумата за плати и надоместоци се зголемува за 7,65 милиони евра, и за оваа намена сега се планирани  да се потрошат 431 милиони евра.