Бугарија со масовна кампања ќе привлекува на странски инвеститори

Добивај вести на Viber

Од почетокот на март Бугарија започнува со масовна рекламна кампања за претставување на инвестициските можности на државата. Според информациите од Бугарската агенција за инвестиции (БАИ), веќе е купен рекламен простор во медиуми како The Economist, Financial Times, BusinessWeek, The Wall Street Journal, како и на интернет-страниците им неколку светски телевизии. „Кампањата ќе трае три месеци, а рекламите ќе бидат насочени кон информирање на странските инвеститори за предностите на нашата земја како инвестициска дестинација или на одредени индустрии - инженеринг, електроника и електротехника, прехранбена индустрија, аутсорсинг“ соопшти извршниот директор на Бугарската агенција за инвестиции Борислав Стефанов, пренесуваат бугарските медиуми. Во наредниот период, според него, Бугарската агенција за инвестиции, заедно со Financial Times, ќе организира серија на инвестициски форуми - тркалезни маси во Чикаго (19 февруари), Њујорк (20 февруари) и Сан Хозе ( 26 февруари) и меѓународна конференција во Њујорк (21 февруари). „Во март агенцијата во партнерство со Financial Times планира и неколку инвестициски настани во Сеул, Хонг Конг и Токио. Предвидено е да има средба со претставници на три големи групи на индустријата - електрониката,електротехниката, транспорт и логистика. Ќе бидат промовирани можностите за развој во Бугарија на медицински туризам, развој на прехранбена индустрија и земјоделство„ информира Стефанов. Последниот настан на Агенцијата е закажан за крајот на март во Брисел. Оваа конференција ќе биде посветена на хемиската индустрија, транспорт и логистика. Вкупно за програмата за маркетинг и рекламирање на инвестициските можности на Бугарија се предвидени 16 милиони лева, или околу 8 милиони евра.