Бугарите разочарани од македонските „црвени линии“

Добивај вести на Viber

Бугарите се разочарани од македонските „црвени линии“. 

Бугарија е разочарана од Резолуцијата која е изгласана вчера во Македонија за „црвените линии“ во преговорите. 

Источниот сосед со жалење констатира дека таа доаѓа во моменти кога дијалогот меѓу Софија и Скопје, како резултат на вложените дополнителни напори, почнал да преминува во попозитивна и ветувачка фаза. Ова е наведено во официјалната реакција од Министерството за надворешни работи на Бугарија. Внимателно ќе ја анализираат содржината и од гледна точка на нејзината усогласеност со Договорот за пријателство, добрососедство и соработка, но и во однос на нејзиното потенцијално влијание врз дијалогот меѓу двете земји.

„За Бугарија е целосно неприфатливо со вакви акти да се мотивира или да се оправдува неисполнување на Договорот од 2017 година, што би било спротивно на принципите на меѓународното право“, додаваат од бугарското МНР.

Собранието вчера со 96 гласа „за“ и еден „воздржан“ ја усвои Резолуцијата за утврдување на македонските државни позиции. 

ВМРО-ДПМНЕ го поздрави донесувањето на Резолуцијата во македонското Собрание со која јасно се оцртуваат национални и државни позиции во однос на македонскиот јазик, историја и идентитет.

Шефот на државата Стево Пендаровски во престојниот период не очекува некои поголеми промени во однос на спорот со Бугарија, со оглед на тоа што земјава реално во моментов нема соговорник од другата страна, бидејќи Софија се уште нема формирано Влада. 

Тој вели дека не е исклучена можноста во преговорите да има и трета страна за да се постигне некакво решение во однос на спорот меѓу двете земји.