Добивај вести на Viber
Државната комисија за енергетско и водно регулирање (ДКЕВР) почнала постапка за одземање лиценца на „ЧЕЗ“, чешката компанија која врши дистрибуција на струја во Бугарија, пренесоа бугарските медиуми.
Ова се случува неколку часа откако премиерот Бојко Борисов рече дека компанијата ќе остане без лиценца. Обвинителството, исто така, се огласи со поддршка на таква постапка.
Претходно денеска во официјална изјава ЧЕЗ соопшти дека изјавата на премиерот Бојко Борисов за одземање на лиценцата на ЧЕЗ било спротивно на законите на Бугарија како членка на ЕУ. Подоцна дојде и реакција на официјален претставник на Чешка.
„Одлуката на Бугарија да ја одземе лиценцата на ЧЕЗ за пренос и дистрибуција на струја е загрижувачка, изјави чешкиот министер за индустрија и трговија, Мартин Куба, пренесе Ројтерс.
Пред само месец ЧЕЗ ја загуби лиценцата и во Албанија.
Бугарската Влада и граѓанските протести
Ваквото однесување на бугарската влада доаѓа по бранот протести кој ја тресе државата изминатите денови. Илјадници граѓани излегоа на улиците на Согија и останатите градови за да протестираат поради високите сметки за струја минатиот месец. Покрај намалување на сметките за струја тие бараа и оставка од Вадата.
Во денешната изјава премиерот Борисов посочи дека не планира да даде оставка, но ја остави отворена можноста за предвремени избори ако продолжат протестите. Истовремено тој најави и поевтинување на струјата за 8%.
Вчера бугарскиот министер за финансии Симеон Џанков најави повлекување од функцијата, а медиумите ваквиот чин го поврзаа со масовните протести.