Бујар Османи за Нефи Усеини: ДУИ нема никој да заштитува ако го прекршил законот
Објавено во: Македонија 30 Јули, 2019
Бујар Османи, вицепремиерот за евроинтеграции, по последните испади на советникот во општина Охрид, Нефи Усеини, рече дека ДУИ нема никој да заштитува ако се покаже дека истиот го прекршил законот.
Усеини е сопственик на локалот „Луна“, а објектот е изграден на државно земјиште и во заштитен појас на УНЕСКО. Откако е почната неговата изградба во март годинава, никој воопшто не се ни обидел да ја спречи дивоградбата. Усеини уште кога почна да го гради објектот доби решение од Општина Охрид дека има десет дена рок самиот да ги урне конструкцијата и платформата. Освен ова, Усеини неколку пати до сега, како што тврдат од албанските опозициски партии се „однесувал каубојски“ и во меѓувреме имаше испади со физички пресметки.
- Може некој претставник на ДУИ да бил инволвиран, видовме за што се работи. Доколку се започне со неселектоивно рушење на дивоградбите, ќе ни биде чест рушењето да започне од него. Но при тоа да нема селективен пристап, да не се партизира со погрешен пристап. Нема потреба да се партизира и политизира. Секој си носи одговорност за постапките. ДУИ нема никој да заштити што го прекршил законот. Не само во Охрид како најсензитивно подрачје, туку и во цела Македонија, рече Османи.
Додаде дека ДУИ како партија била предлагач на законот за спречување на дивоградбите и дека од таму порачуваат да се започне со нивното неселективно уривање.