„Бука“:Кради и молчи додека никој не те чепка во БиХ!

Добивај вести на Viber

Манипулацијата на политичките партии со исплати на парични средства во приватни цели – плаќање на трошоци за образование на членови и нивните деца, екскурзии, па дури и сметки за електрична енергија, откуп на сопствени книги, лажни сметки за гориво, службени патувања, дневници, нелегални исплати на топли оброци и надоместоци на набљудувачи, се само некои од неправилностите кои се утврдени со ревизорската истрага на извештајот за финансиско работење, пренесува сараевскиот портал Бука кој додава дека даночната управа на Федерацијата БиХ нема намера да го наплати затаениот данок – си ги чуваат сопствените позиции!

Сите спорни извештаи за финансиското работење на политичките партии кај кои се утврдени неправилности кои имаат елементи на кривични дела, како што се корупција, криминал, затајување на данок и други видови на малверзации ќе бидат доставени до Обвинителството на БиХ. Тоа е заклучок на Централната изборна комисија (ЦИК) на БиХ по изрекувањето на најновите санкции поради неправилности утврдени во годишните финансиски и постизборни извештаи кои се однесуваат на 2010 година, т.е. кршење на членови на Законот за финансирање на политичките партии во БиХ, пренесува Бука.

Инаку од ЦИК се незадоволни од однесувањето на Обвинителството на БиХ кое до сега не процесуирало ниту едно лице во политичките партии поради утврдени малверзации во годишните финансиски извештаи, а не се процесуирани ни поединци кои биле одговорни за обиди за изборен инжинеринг на изборите во 2010 година. Од Изборната комисија оценуваат дека нивна обврска е на надлежното Обвинителство само да укажат на неправилностите.

Така, како прв спорен извештај во Обвинителството на БиХ ќе заврши предметот на Хрватската христијанско-демократска унија (ХКДУ) на БиХ. ЦИК на БиХ на оваа партија веќе изрече парична казна од 5.000 КМ поради кршење на Законот за финансирање на политички партии на БиХ, но за тоа што не е надлежен има намера да укаже на Обвинителството на БиХ иако ревизорите откриле низа сериозни елементи на корупција и криминал. Кради и молчи додека никој не те чепка, пишува Бука. „Токму затајувањето на данокот е посебен проблем кој го евидентираа во Службата за ревизија на ЦИК на БиХ. На Даночната управа на Федерацијата БиХ сугерирано е да изврши контрола и од политичките партии да го наплати затаениот данок, но таа тоа не го прави. Во неслужбен разговор од Даночната управа на ФБиХ некои директори дури и соопштија дека не им паѓа ни на ум да влегуваат во политичките партии и да го наплатат данокот, бидејќи така можат да изгубат глава. Однесувањето на Обвинителството на БиХ и Даночната управа на ФБиХ поради тоа се најдобар одговор зошто токму политичките партии во Босна и Херцеговина веќе со години се на прво место по корупција“, обвинува порталот.