Царовска: Ако треба ќе одам уште 200 пати во Тимјаник за да им објаснам на селаните
Објавено во: Македонија 12 Јуни, 2018
Министерката за труд и социјална политика, Мила Царовска на заедничкиот брифинг со претставникот на УНИЦЕФ, Бенџамин Перкс, денеска порача дека ќе биде упорна за да ја добие согласноста на селаните во селото Тимјаник за случајот со децата со посебни потреби.
Според министерката, оваа средба со жителите од Тимјаник била јавна за да можат сите да видат и за да не излезе потоа дека никој не ги прашал жителите дали во нивната општина може да се основа таква установа.
„Ако треба ќе одам уште 200 пати во Тимјаник за да им објаснам на селаните дека основањето на мал групен дом во кој ќе бидат сместени 3 деца со посебни потреби, е добро за целата општина, и се надевам дека на крајот ќе ја добијам нивната согласност. За да нема повеќе вакви реакции, потребна е едукација на населението“- вели Царовска.
За понудите на другите општини, таа изјави дека им е благодарна но дека овој дом е предвиден во Тимјаник, но дека нема да бидат заобиколени ни другите општини, односно, планот е вакви мали групни домови да има во секоја општина во Македонија за да може да се спроведе планот за деинституционализација.
Царовска рече дека за надминување на вакви ситуации не се доволни само кампањи и дејствувања на граѓански организации, туку е неопходно интервенирање преку образовниот процес, уште од најраната предшколска возраст.
Министерката најави дека до крајот на годинава најмалку пет деца треба да излезат од Домот во Демир Капија каде се сместени околу 200 лица, а од Домот „25 Мај“ сите 25 ќе излезат наеднаш до крајот на овој месец.
Вакви групни домови веќе функционираат во неколку општини, меѓу кои во Неготино, Кавадарци, Берово.