Центарци не сакаат изградба на нова катна гаража

Добивај вести на Viber

Жителите на центар не дозволуваат изградба на катна гаража од 29 метри која треба да никне кај Автомакедонија. “Дали им се важни нашитеживоти или нивниот профит?”, го прашаа вчера жителите градоначалникот на општина Центар, Андреј Жерновски, на средбата организирана на нивно барање. Според Жерновски на ова место нема потреба од катна гаража, бидејки на 20 метри од новопланираната, веќе има катна гаража која зјае полупразна. “Иако рокот за издавање на одобрение за градење согласно договорот за оттуѓување на градежното земјиште истече во јули 2013та, Министерството за транспорт и врски и државниот правобранител застанаа на страната на оној кој доби дозвола за изградба на катна гаража”, рече Жерновски. Катната гаража која треба да се изгради, ќе биде во барок стил. Во септември 2011 според тогашниот урбанистички план било предвидено објектот да биде висок 21 метро за во април 2012 да се дозволат уште 8 метри висина. Според изјавите на Жерновски досега се извршени 6 инспекции во општина Центар за овој случај и со самото тоа – се врши притисок за да се издаде одобрение за градење. Од понеделник, секој од жителите ќе има право на приговор за донесеното решение, а кривична пријава ќе добијат и Министерството за транспорт и врски и правобранителот за кого овој договор е валиден, иако е со истечен рок.