Чебрен и Галиште ќе ги градат Руси?

Добивај вести на Viber

Влез во енергетскиот сектор во земјите од Западен Балкан најавуваат русите, а не се исклучува ни можноста руска компанија да се јави на тендерот за Чебрен и Галиште, вели  министерот за економија, Ваљон Сараќини. Според Министерството за економија и анализите што се прават за состојбата во електроенергетскиот сектор во земјата и во регионот, може да се заклучи дека Русија преку своите енергетски компании полека навлегува во енергетскиот сектор во регионот. Како што е познато, руска компанија е сопственик и на ТЕ-ТО Скопје („Синтезис Груп”), која е независен производител на електрична и топлинска енергија, а од 1 јануари годинваа компанијата „Балкан Енерџи Груп”, која исто така е поврзана со „Синтезис Груп” е носител на лиценците за производство, дистрибуција и снабдување со топлина во Скопје. На 8 ноември 2012 година беше објавен Јавниот повик за изградба на хидроелектрани на Црна Река, т.е за ХЕ Чебрен и ХЕ Галиште, а една од компаниите која откупи тендерска документација е и компанијата „Балкан Енерџи Груп”, според Сарачини не е исклучена можноста оваа компанија да достави понуда за изградба на овие две хидроелектрани. -Интерес генерално постои за сите овие фирми, барем поаѓајќи од интересот за добивање на податоци, како и директни посети од страна на заинтересирани инвеститори. Бидејќи рокот за претходно објавените јавни повици за продажба на акциите на Република Македонија во ОХИС АД Скопје и Еурокомпозит АД Прилеп беше продолжен, а заинтересираните можат да подигнат тендерска документација и да достават понуди до 16.04.2013 година, премногу е рано да се зборува дали и колку понуди би добиле до крајниот рок. Веќе е познато во јавноста дека за друштвото ОХИС официјално е заинтересирана компанијата Алкот Груп, со седиште во Швајцарија. За Еурокомпозит АД Прилеп, пак, досега интерес пројавија компании од Велика Британија, САД, Турција и Литванија“, изјави Сараќини.