Да сум Заев би ги прашал „зошто ми ја оцрнувате земјата пред светот со пишување на сите починати само од ковид“: Д-р. Пановски со детали од протоколите

Добивај вести на Viber

Јавноста во Македонија е силно вознемирена, не само од високиот број новозаразени, напротив, од високиот број починати лица. Само во последните 10 дена, во статистиката на Министерството за здравство се впишани дури 124 лица како починати од корона вирусот. Граѓаните прашуваат, зарем нема кој да ги лечи, дали сите се со коморбидитетит, кријат ли, па доцна доаѓаат кога веќе нема спас, каде е грешката во нашиот здравствен систем.

Низа прашања, на кои досега здравствените власти велат дека навистина најголемиот број од починатите имаат и други здравствени состојби, но има и пациенти кои немале коморбидитети. Само пред неколку дена министерот за здравство Венко Филипче изјави дека од самиот почеток ги пријавуваат апсолутно сите случаи.

-Се случува да дојде пациент со друга тешка здравствена состојба, тогаш да му биде направен и ковид тест, тој да почине и потоа да стигне резултатот и да биде позитивен. Ние го пријавуваме и тој случај. И кога некоја друга болест била директна причина за смртта, доколку пациентот бил позитивен на Ковид-19, ние го пријавуваме како смртен случај од ковид, рече Филипче.

Директорот на Центарот за јавно здравје, епидемиологот, д-р. Александар Стојанов вели дека тоа го бара Светската здравствена организација и дека така е според протоколите, токму од СЗО.

-Такви се протоколите, ние од почетокот на епидемијата почнавме со таа статистика и токму затоа велиме дека единствено кај нас во регионот постои реална епидемиолошка слика. Но, морам да кажам дека имавме и еден случај при кој лицето си го одзело животот со бесење, но бидејќи беше позитивен на корона, влезе во статистиката на починати од Ковиид-19, вели д-р. Стојанов.

Од друга страна, пак, еден од врвните миктобиолози во Македонија, д-р. Никола Пановски, вели дека протоколите не се такви и дека со црвено стои кои пациенти не смеат да влезат во статистиката на починати од Ковид-19.

-Јас да сум премиерот Зоран Заев, би ги викнал и би ги прашал, ’зошто ми ја оцрнувате земјата пред Европа и воопшто пред светот со впишување на пациенти кои починале од друга боест, дека починале од корона вирусот’. Македонија е високо во првите десеттина земји по број на починати, бидејќи секој пациент кој починал, па дури и од срце, излив, ако бил позитивен на вирусот, влегува во црната статистика на починати од Ковид-19. Тоа не е така, на пример во Германија. Ако пациентот имал последна фаза на канцер, не се регистрира дека починал од корона вирусот. Починатите пациенти од Ковид за да влезат во таа статистика мора да покажале барем еден симптом на болеста, а тие симптоми се веќе познати. Инаку, протоколот на СЗО е јасен, пациенти кои починале од срцев удар, мозочни изливи, сообраќајќи, други несреќи, и да биле постмортем позитивни не починале од корона, вели Пановски.

Вчерашниот ден сепак ќе биде запаметен како ден со прва рекордна бројка од дури 870 позитивни на вирусот, од почетокот на епидемијата, но д-р. Пановски веќе предупреди дека во наредниот период, би имале уште поголеми бројки на новозаразени, а би имало и по 100 погреби дневно, доколку не се преземат некакви мерки.